Erin úndestigi nege tańbalanbaıdy?

6.12.2018 Master slide 187
Qazaq qoǵamynda qoldanylǵan arab jazýynyń qadım, jadıd túrlerinde erin úndestigi júıeli túrde tańbalanyp otyrdy: úıúm, qoluń, búgún t.b. Tipti alǵashqy býynda ezýlik daýysty tursa da, sońǵy býynǵa erindik daýystylardy jazý úrdisi ХХ ǵasyrdyń basyna deıin saqtaldy: barub, kelúb, aıtatun, beretún, barur, kelúr, t.b.

Bulaısha jazylýynyń basty sebebi, sol kezeńdegi jazýda fonetıkalyq prınsıptiń (aıtylýy boıynsha jazý) basym bolýy jáne túrki tilderiniń týystyq negizine jaqyndatyp jazýdyń bertinge deıin jalǵasýy. Erin úndestigi qaı ýaqyttan bastap tańbalanbady jáne tańbalanbaýynyń sebebi nede? ХХ ǵasyrdyń basynda, ult zıalylary qazaq tilindegi erin úndestigin jazýda tańbalaý qajet pe, joq pa degen másele tóńireginde biraz daýlasqan bolatyn.

1924 jyly ótken «Qazaq bilimpazdarynyń tuńǵysh sıezinde» E.Omaruly: «Buryn eski túrik tilinde y-nyń ornyna kóbinese u dybysy aıtylatyn. Biraq júre kele qazaq tili basqa túrik tilinen jigi ashylyp, u dybysy bar sózderdiń kóbi y-men aıtylatyn bolǵan. Bul qazaq tiliniń óz erkimen bolǵan ózgerisi», - degen bolatyn. Al A.Baıtursynuly qory, toqy, mujy sózderin qoru, toqu, muju dep jazatyn bolsaq, olardyń táýeldeý túrleri de u arqyly jazylýy tıis bolyp shyǵady deıdi: qoruýu, toquýu, mujuýu. 1929 jyly 2-4 maýsymda Qyzylordada ótken emle konferensıasynda T.Shonanuly: «Bizdiń tusymyzda erin úndestigi birte-birte quryp bara jatqanyn baıqaımyz. Budan 50 jyl ilgeri Radlov júgúrgón dep jazsa, bul kúnde esh qazaq olaı jazbaıdy, júgirgen dep qana jazady. Biz endi Radlovsha jaz dep eshkimdi zorlaı almaımyz. Sondyqtan emlemizde erin úndestigi bolmasqa kerek», - deı otyryp, erindik daýystylardy sońǵy býynda tańbalamaýymyzdyń sebebin bylaısha túsindiredi: «Erindik daýystyń alǵashqy býynnan artyqqa jibermeıtin sebebimiz ne? Muny qısynǵa súıep túsindirgim keledi. Or degen sózge, ady qossaq, orady bolady, orodu bola almaıdy, sol sıaqty, tur-dan turady bolady, turodu bola almaıdy», - deıdi.

Qazirgi tańda, áleýmettik jelilerde babalar tilindegi erin úndestigin qaıtadan jańǵyrtyp, jazýymyzǵa endirý qajet degen pikirler kezdesip qalady. Alaıda kómóktós, júrók, burum, qolu dep jazǵan kúnniń ózinde kómóktóskóndórdúń, kómóktósúp, júróktórúndógú, burumdorunuń, qolummón, qolumdoǵy dep esh qazaq dybystamaıtyny búgingi tańda daý týdyrmaıtyn másele. Ǵalym N.Ýálı túbir sózdegi erin úndestigi, qosymshalardyń yqpalyna qaraı, aldynala ezýlik dybysqa aınalyp ketetinin aıtady.

Qoryta aıtqanda, erin úndestigin jazýda tańbalamaý ХХ ǵasyrdyń basynda bastaldy. Oǵan erin úndestiginiń birte-birte joǵalýy, bas býyndaǵy erindik daýystynyń yqpaly ekinshi býynnan ári asa almaýy, ekinshi jáne úshinshi býyndardaǵy dybystardyń dál erindik bolyp anyq estilmeýi áser etti. Osynyń negizinde jazýda erin úndestigi elenbeı, kómeski estiletin jerlerde ezýlik dybystary jazylatyn bolyp ornyqty. Bul alash zıalylary eskertip ketkendeı, «qazaq tiliniń óz erkimen bolǵan ózgerisi».

Gúlfar Mamyrbek

Sh.Shaıahmetov atyndaǵy «Til-qazyna»

ulttyq ǵylymı-praktıkalyq ortalyǵynyń

jetekshi ǵylymı qyzmetkeri, f.ǵ.k.