Шайсұлтан Шаяхметов атындағы «Тіл-Қазына» ұлттық ғылыми-практикалық орталығы» коммерциялық емес акционерлік қоғамы

«Шайсұлтан Шаяхметов атындағы «Тіл-Қазына» ұлттық ғылыми-практикалық орталығы» коммерциялық емес акционерлік қоғамы ең алғаш Қазақстан Республикасы Үкіметінің 1999 жылғы 9 қазандағы № 1545 қаулысына сәйкес "Республикалық мемлекеттік тілді жеделдетіп оқыту орталығы" республикалық мемлекеттік қазыналық кәсіпорын болып құрылды. Бұл республикалық орталықта ең алғаш қоғам қайраткері Шайсұлтан Шаяхметұлы Шаяхметов басшы болды. Кәсiпорынның қызметiнiң негiзгi нысаны мемлекеттік қызметшiлерге қазақ тiлiн интенсивтi оқытуға барлық қажетті ұйымдастырушылық және материалдық-техникалық жағдайлар жасауды ұйымдастыру, сондай-ақ оны оқу-әдiстемелiк және ғылыми қамтамасыз ету болып белгіленген.

Қазақстан Республикасы Үкіметінің 2008 жылғы 14 қаңтардағы №12 қаулысына сәйкес Қазақстан Республикасы Мәдениет және ақпарат министрлігі Тіл комитетінің "Шайсұлтан Шаяхметов атындағы Тілдерді дамытудың республикалық үйлестіру-әдістемелік орталығы" республикалық мемлекеттік қазыналық кәсіпорны болып қайта құрылды.

Қазақстан Республикасы Үкіметінің 2018 жылғы 31 наурыздағы №151 қаулысына сәйкес «Шайсұлтан Шаяхметов атындағы тілдерді дамытудың республикалық үйлестіру-әдістемелік орталығы» акционерлік қоғамы болып құрылып, дәл осы қаулымен «Шайсұлтан Шаяхметов атындағы «Тіл-Қазына» ұлттық ғылыми-практикалық орталығы» коммерциялық емес акционерлік қоғамы болып қайта құрылды. Қазақстан Республикасы Мәдениет және спорт министрлігі Тіл саясаты комитетіне қарасты «Шайсұлтан Шаяхметов атындағы «Тіл-Қазына» ұлттық ғылыми-практикалық орталығы» коммерциялық емес акционерлік қоғам (бұдан әрі – «Тіл-Қазына» ұлттық орталығы) қызметінің негізгі нысаны – ғылыми зерттеулер, білім беру технологиялары мен қосымша білім беру әзірлемелері саласындағы қызметті жүзеге асыру.

«Тіл-Қазына» ұлттық орталығы елімізде мемлекеттік тіл саясатын жүзеге асыруда ғылыми-әдістемелік сүйемелдеу қызметін атқарып келеді. Атап айтқанда, облыс орталықтарында, Астана, Алматы, Шымкент қалараларында, аудандарда орналасқан барлық мемлекеттік тілді оқыту орталықтарының ересек азаматтарға қазақ тілін оқыту әдіснамасын жүйелеу мен стандарттау, әдіскерлер мен оқытушыларға әдістемелік көмек көрсету, оқу-әдістемелік құралдардың мазмұнын әзірлеу, баспадан қажетті көлемде шығару, қамтамасыз ету, ақпараттық-технологиялардың жетістіктерін пайдаланып бағдарламалық жабдықтаулар әзірлеумен айналысады.

Қазақ тіліндегі термин сөздер мен жер-су атауларындағы өзекті проблемаларды талқылау мен саралауға арналған Терминология мен ономастика саласындағы Ұлттық комиссия жұмысы да «Тіл-Қазына» ұлттық орталығы тарапынынан үйлестіріледі.

Қазақстан Республикасының Президенті Н.Ә. Назарбаевтың  2017 жылғы 12 сәуірдегі «Болашаққа бағдар: рухани жаңғыру» мақаласындағы қазақ әліпбиін кириллицадан латын графикасына көшіруге арналған бағдарламалық тапсырмасына сәйкес қазақ тілін латын графикасына кезең-кезеңімен көшірудің ғылыми-ұйымдастырушылық міндеттерін атқаратын Орфографиялық жұмыстар бағыты бойынша жұмыс басталды.

«Тіл-Қазына» ұлттық орталығы әр жылдарда бірнеше оқу-әдістемелік құралдарды жарыққа шығарды:

• «Мәртебелі сөз»;
• «Мемлекеттік қызметшінің тілдік портфелі»;
• «Қазақ тілі» деңгейлік оқулықтары;
• «Тілмаш»;
• «Қазақ сөзі»;
• Әлем тілдерінде жазылған үздік шығармалардың аудармалары;
• және т.б.

«Тіл-Қазына» ұлттық орталығы атқаратын негізгі іс-шаралар:

• Жыл сайынғы қазақ тілінің оқытушылары мен әдіскерлері арасындағы республикалық байқау;
• Жыл сайынғы жастар арасындағы «Тілдарын» республикалық олимпиадасы;
• Терминология мен ономастика тақырыптарына байланысты семинар-кеңестер;
• Латын графикасына көшірудің ғылыми-ұйымдастырушылық міндеттері бағытындағы семинар-кеңестер;
• «Қазақстанның болашағы қазақ тілінде» ақпараттық-насихат дөңгелек үстелдері;
• және т.б.