Qalamgerler kitaby Túrkıada jaryq kórdi

2.5.2019 Master slide 422
Bilimdar ádebıetshi, daryndy synshy, ult aldyndaǵy qaryzy men paryzyn telqońyrdaı teń ustaǵan Saǵat Áshimbaevtyń «Ádebı syn maqalalary», sol sekildi ózindik qoltańbasy bar, qazirgi qazaq áıelder prozasynyń belgili ókili Shárbaný Beısenovanyń «Bir mahabbat baıany» jáne «Súzgeniń sońǵy kúnderi», «Bozoq arýy» atty eki jınaǵy bir kitapqa biriktirilip túrik tilinde jaryq kórdi.

Osy irgeli týyndylardyń tusaýkeser rásimi baýyrlas túrik jurtynda ótip, oǵan Qazaqstannyń Túrkıadaǵy Tótenshe jáne ókiletti elshisi A.Saparbekuly, Túrkıa Respýblıkasy Prezıdentiniń Bas keńesshisi Ia.Topchý, Túrksoı Bas hatshysy D.Qaseıinov, Eýrazıa Jazýshylar odaǵynyń tóraǵasy Ia.Ómeroǵlý, ózge de qoǵam, qalam qaıratkerleri, Túrkıada bilim alyp jatqan qazaq jastary, qazaq dıasporasy ókilderi, oqyrman qaýym qatysqan. Elshi A.Saparbekuly túbi bir túrki jurtymen qarym-qatynastyń jaqsy ekenin, ár jyl saıyn Alǵys aıtý kúnine oraı osyndaı is-sharalardyń ótip turatynyn tilge tıek etip, S.Áshimbaev pen onyń jary Sh.Beısenovanyń túrik tilinde jaryq kórgen kitaptaryna sholý jasap, mundaı ıgi qadam aldaǵy ýaqytta da jalǵasa beretinin jetkizgen.

Túrkıa Prezıdentiniń Bas keńesshisi Ia.Topchý myrza túrik jurtymen qazaq halqynyń arasyndaǵy berik dostyqty, izgi nıettestikti tarata aıtyp, buǵan eki el prezıdentteriniń erekshe mán berip otyrǵanyn, Túrki áleminiń, jalpy Eýrazıa keńistigindegi memleketterdiń qarym-qatynasyn damytý isindegi oń qadamdarǵa jete mán bergenin atap ótti. Tusaýkeser rásiminde sóz alǵan Eýrazıa Jazýshylar odaǵynyń tóraǵasy Ia.Ómeroǵlý qazaq pen túrik jazýshylary men ǵalymdarynyń tereń baılanysta ekenin, ásirese jazýshylar shyǵarmalaryn aýdarý isinde tyń qadamdar jasalyp jatqanyn alǵa tartyp, qazaq synshysynyń bilimdarlyǵy men parasat-paıymyna tánti bolǵanyn jetkizip, qazaq arýlaryn óz shyǵarmasyna arqaý etken Shárbaný Beısenovanyń eki kitabyna erekshe mán berip, tarıhı tulǵa dárejesine kóterilgen Súıimbıke, Súzge, Bozoq arýlary jaıly jan-jaqty sóz qozǵady. Kitaptardy aýdarǵan J.Kynajy tarıhı týyndylardaǵy oqıǵalardyń túrki halyqtarynyń basynan ótken qıly kezeńder ekenin eske salyp, bul Elbasy Nursultan Nazarbaevtyń barlyq túrki halyqtaryna ortaq tulǵalardy tanytý jónindegi ıdeıasyn baýyrlas elde múltiksiz oryndaý barysyndaǵy elshi A.Saparbekulynyń uıymdastyrýshylyq qabiletin joǵary baǵalady. Osy arada jazýshy Shárbaný Beısenova Halyqaralyq Shyńǵys Aıtmatov medalimen marapattalǵanyn, ony TURKSOY uıymynyń Bas hatshysy D.Qaseıinov tapsyrǵanyn aıta ketsek deımiz.


Kitaptardyń avtory Shárbaný Beısenova mundaı is-sharaǵa shynaıy iltıpatyn bildirip, qazaq ádebı synynyń ókilderi, sonyń ishinde jary Saǵat Áshimbaev týraly da tereńnen oı qozǵap, óz kitaptarynyń basty keıipkerleri qaharman qazaq qyzdary ekenin atap aıtty. «Baldyrǵan» jýrnalynyń bas redaktory D.Maǵlumov óz kezeginde táýelsiz qazaq eliniń ótkeni men búgininen derekter keltirdi. Synshy Saǵat Áshimbaevtyń ómir joly men shyǵarmashylyǵyn jınalǵan jurtqa tanystyryp, mundaı taǵylymdy iske uıytqy bolǵan azamattarǵa iltıpatyn bildirdi.

Jomart Dáýlet