Qatelerdi feısbýk arqyly habarlaýǵa bolady

30.4.2019 Master slide 305
Kóshedegi, mekeme mańdaıshalary men jarnamalardaǵy kezdesetin qatelerdi feısbýk arqyly habarlaýǵa bolady

Elorda turǵyndaryn «Til tazalyǵy – barshaǵa ortaq is» aksıasyna qatysýǵa shaqyrady, dep habarlaıdy qala ákimdiginiń resmı saıty. Tilderdi damytý jáne muraǵat isi basqarmasy Kásipkerler palatasynyń qalalyq fılıalymen birlesip, «Til týraly» zańnamanyń saqtalýyna monıtorıń júrgizý boıynsha aksıanyń bastalǵanyn jarıalady.

Nur-Sultan ákimdiginde «Til tazalyǵy – barshaǵa ortaq is» jobasy aıasynda ótken dóńgelek ústel barysynda eki aılyq aksıa bastaý aldy. Tilderdi damytý jáne muraǵat isi basqarmasynyń bas mamany Aıgúl Imanǵalıdiń aıtýynsha, aksıa aıasynda vedomstvo qyzmetkerleri osy ýaqyt ishinde aýdandyq ákimdiktermen, Sáýlet, qala qurylysy jáne jer qatynastary, Investısıa jáne kásipkerlikti damytý basqarmalary, Kásipkerler palatasynyń qalalyq fılıalymen birlesip, zańsyz ornatylǵan, sondaı-aq til normalaryna sáıkes kelmeıtin syrtqy jarnamalardyń barlyq nysandaryn tekserip, tıisti usynystar beredi, atalǵan bıznes-nysandardyń ıelerine «Til týraly» zańnyń normalaryn túsindiredi.

«Bizdiń basqarmaǵa turǵyndar tarapynan memlekettik tilde jazylǵan syrtqy jarnama mátinderinde, basqa da kóptegen kórneki materıaldarda óreskel qatelerdiń bolýyna, sondaı-aq, zańnamanyń basqa da talaptarynyń saqtalmaýyna qatysty shaǵymdar jıi túsedi. Biz bireýdi jazalaý maqsatyn kózdemeımiz, biz zańnyń negizgi talaptaryn túsindiretin bolamyz. Bizdiń basty maqsatymyz – osy», – deıdi Aıgúl Imanǵalı.

Aksıa barysynda PIK qyzmetkerleri úshin semınar-trenıńder ótkiziledi. A. Imanǵalı atap ótkendeı, kireberisten bastap, barlyq kórneki aqparat zań talaptaryna sáıkes kelýi úshin retke keltiriletin bolady. Bul is-sharalarmen jeke balabaqshalar, balalarǵa arnalǵan túrli ortalyqtar qamtylatyn bolady. Til normalaryn buzýdy rastaıtyn aqparat pen fotosýretterdi myna mekenjaı boıynsha elektrondyq poshtaǵa jiberýge bolady: a.imangali@astana.kz. Sondaı-aq, aqparat Feısbýk áleýmettik jelisindegi «Til basqarmasy» akaýntynda qabyldanady. Hatta syrtqy jarnamanyń ornyn, fotosýrettiń jasalǵan kúnin kórsetý qajet.

«Til-Qazyna» aqparat