Eldik múddeni tanytatyn tól ataýlar

29.11.2018 Master slide 473
Elimizdiń táýelsiz memleket retinde damýy, ulttyq jáne eldik qundylyqtardy qalyptastyrý onomastıka salasymen tikeleı baılanysty. Bul baǵytta aýyz toltyrarlyq maqsatty jumystar atqarylǵany málim. Áli de atqarylatyn sharýalar josparymyzda bar. Elimizdegi jer-sý attaryna óziniń tarıhı ataýlaryn berý, keshegi otarshyldyq, keńestik saıasattan qalǵan ıdeologıalyq jaǵynan eskirgen ataýlardy eldik múdde turǵysynan qarastyrý máselesi júıeli túrde júrgizilýde.

Pavlodar oblysynyń Kachır jáne Lebıaje aýdandaryna Tereńkól jáne Aqqýly ataýlary qaıta oralyp, el-jurttyń tarıhı jadyn bir jańǵyrtqan bolatyn.
«Shyǵys Qazaqstan oblysyndaǵy Zyrıan aýdany Altaı bolyp ózgerdi» degen súıinshi habarǵa da súısinbegen el qalmady desek artyq aıtqandyq emes.
Balqash qalasynyń №15 mektep-lıseıine Alash ardaqtysy, ult kósemi Álıhan Nurmuhameduly Bókeıhannyń esimi berilip, urpaqq́a ulyqtaldy.

Atyraý qalasynyń №18 orta mektebine ekinshi dúnıejúzilik soǵysqa qatysqan, qazaqtyń atyn shyǵarǵan ushqysh áıel, Qazaqstan Respýblıkasynyń Halyq qaharmany Hıýaz Dospanovanyń aty berilse, Taraz qalasyndaǵy №10 orta mekteptin Keńes Odaǵynyń Batyry, Halyq qaharmany Saǵadat Nurmaǵambetovtiń esiminiń berilýi ór tulǵaly erlerin týǵan eliniń eshqashan umytpaǵandyǵynyń dáleli dep bilemiz.

Sondaı-aq Taraz qalasyndaǵy Qalalyq mádenıet úıine táńirlik aspap – qobyzdy sóıletken dáýlesker kúıshi, birtýar kompozıtor Yqylas Dúkenulynyń, Jambyl oblystyq fılarmonıasyna áıgili halyq aqyny, kompozıtor, ǵasyrǵa jýyq ǵumyr keshken Kenen Ázirbaevtyń esimi berilgendigin qýana jarıalaımyz.