Arystanbek MUHAMEDIULY: «Til – Qazyna» memlekettik tilimizdiń mereıin asyrsyn!

26.11.2018 Master slide 321

Qazaqstan Respýblıkasynyń Prezıdenti – Elbasy Nursultan Ábishuly Nazarbaevtyń qazaq tili álipbıin kirilisadan latyn grafıkasyna kóshirý týraly tapsyrmasyn iske asyrý boıynsha Mádenıet jáne sport mınıstrligi birqatar jumystar atqarýda. Búginde Memleket basshysynyń Jarlyǵyna sáıkes Ulttyq komisia qurylyp, onyń janynan arnaıy jumys toptary jasaqtalǵany belgili. Sonymen qatar, jańa álipbıge kóshýdiń aıryqsha mańyzdylyǵy eskerilip, Mınıstrlik janynan Shaısultan Shaıahmetov atyndaǵy «Til- Qazyna» ulttyq-ǵylymı praktikalyq ortalyǵy qurylǵan bolatyn. Qazirde atalǵan ortalyq qyzmetkerleri latyn grafıkasyna kóshýdiń orfografııalyq, ádistemelik, termınologııalyq jáne tehnıkalyq alǵysharttaryn jasaýmen qatar, halyq arasynda aqparattyq nasıhat jumystaryn júrgizýmen de aınalysýda.

Elbasy «Bolashaqqa baǵdar: rýhanı jańǵyrý» atty maqalasynda: «Men 2012 jylǵy jeltoqsan aıynda jarııa etken «Qazaqstan-2050» Strategııasynda «2025 jyldan bastap latyn álipbıine kóshýge kirisýimiz kerektigin» málimdedim. Bul – sol kezden barlyq salalarda biz latyn qarpine kóshýdi bastaımyz degen sóz. Iaǵnı, 2025 jylǵa qaraı is qaǵazdaryn, merzimdi baspasózdi, oqýlyqtardy, bárin de latyn álipbıimen basyp shyǵara bastaýǵa tıispiz» degen edi. Árıne, jańa álipbı qabyldaý, jazý reformasyn júrgizý – asa aýqymdy, kúrdeli jumys. Osy jaıtty eskere otyryp, Mınıstrliktiń bastamasymen, latyn grafıkasyna negizdelgen qazaq tili álipbıinde qalyń kópshilikke arnalǵan «Til – QAZYNA» gazeti jaryq kórip otyr. Muny Memleket basshysy júktegen, ult bolashaǵy úshin asa mańyzdy mindetti iske asyrý jolyndaǵy taǵy bir aıtýly qadam deýge bolady.

«Til – QAZYNA» gazeti – latyn qarpinde shyǵyp otyrǵan ári jańa álipbıge kóshýge qatysty barlyq aqparatty jan-jaqty qamtıtyn tuńǵysh basylym ekenin atap ótken jón. Qurmetti oqyrman, ulyq is usaqtan ulǵaıyp, az nárse kópke sep bolatyny aıqyn. Endeshe, aqparat aıdynyna jańadan qosylǵan «Til – QAZYNA» gazeti memlekettik tilimizdiń mereıin asyryp, mártebesin bıikteter, ataly jurtymyzdyń, aıbyndy ultymyzdyń kádesine jarar basylymǵa aınalady dep senemiz!

Arystanbek MUHAMEDIULY

Qazaqstan Respýblıkasy Mádenıet jáne sport mınıstri