Bul tildi qoldaý emes

13.12.2019 Master slide 138

Qazir birneshe oblysta Tilderdi damytý basqarmalary ózge basqarmalarǵa qosylyp, tilderdi oqytý ortalyqtary jabylyp, memlekettik emes sektorǵa ótip jatyr. Osynyń saldarynan qazaq tilin oqytý, tilge suranysty arttyrý, qazaq tiliniń qoldanysyn keńeıtý, latyn álipbıin úıretý máseleleri kesheýildeýde, sapasyz atqarylýda.

Oblystaǵy 17 aýdan men 2 qalanyń bárinde til oqytý ortalyqtaryn ashqanbyz, al bul ońaı jumys bolǵan joq. Birqatar aýdandardyń máslıhat sesıalaryna qatysyp, buǵan qajet qarjyny daý-damaımen, aıǵaı-súreńmen bóldirip, qorǵaǵan kezder de boldy. Endi, mine, solardy jabý bastaldy.

Ony qoıyp, til basqarmalarynyń kúni qarań bolǵany jan kúızeltedi. Máselen, bizdiń oblysta byltyrǵy jyldyń sońynda 4 basqarmany – ishki saıasat, til, din jáne jastar saıasaty basqarmalaryn – bir shatyrdyń astyna toǵytty. Memlekettik tildiń barsha qazaqstandyqtardyń ortaq tiline aınalýynda Til basqarmalary men ortalyqtary sheshýshi rólge ıe. Olardy osylaısha qosý, jabý áreketterin jalǵastyra bersek, elimizdegi til saıasaty qalaı júzege aspaq?! Bul qurylymdardyń shtaty, olarǵa jumsalatyn qarjy jergilikti búdjettiń bolmashy bóligin ǵana quraıdy. Olardyń esebinen búdjetti báribir toltyra almaımyz. Sondyqtan olardy jabý qarjylyq jaǵynan da aqtalatyn qadam emes.


Ǵosman Tóreǵul,

jýrnalıs, aýdarmashy