Ýaqyttan utylmaıyq

13.12.2019 Master slide 43

Mirjaqyp aıtqandaı, qazaqtyń oıanatyn ýaǵy bolyp edi...

Jaýyrdy jaba toqımyz dep, ótirik sıfrlardy kóldeneń tartyp, qur maqtanǵandy doǵaratyn ýaqyt jetken sıaqty, aǵaıyn!

Realdy ómirge, qoǵamdaǵy shyndyqqa týra qaraıtyn zaman keldi.

Sonaý toqsanynshy jyldary «memlekettik til qabyldadyq» dep bórkimizdi aspanǵa atyp qýanyp edik. Sóıtsek, Ultaralyq qatynas tili degen basym túskenin ómir kórsetip berdi.

Úıde qazaqsha tili synǵan nemeremizdi qazaq baqshasyna aparsaq, ıá, qazaq baqshasyna aparsaq, – úsh jyldan soń oryssha saırap shyqty, birinshi synypqa oryssha byldyrlap bardy.

Qazaq mektebine kirseńiz – úzilis kezinde oqýshylardyń bári bir-birimen oryssha sóılesip, shapqylap shýlap júrgenderi.

Sóıtip, qazir qalada da, dalada da qazaq tilinde sóılegendi kórsek – balasha qýanatyn boldyq.

Osy qalaı dep aýzy dýaly aqsaqaldarymyzǵa suraq qoıǵanda olardyń aıtqandary:

Munyń báriniń tórkininde sońǵy 15-20 jylda Bilim jáne ǵylym mınıstrliginiń muǵalimder men oqýshylardy tájirıbe alańy jasap jibergendiginen, oıǵa kelgen reformany jasaıtyn synaq polıgonyna aınaldyryp jibergeninen deıdi.

Ana sózine tilin syndyra almaı jatqan búldirshinge birinshi synyptan aǵylshyn úıretemiz dep kúpindik.

Qudaı saqtap, osy jylǵy tamyz keńesinde Prezıdent Qasym-Jomart Toqaev aǵylshyndy úshinshi synypqa aýystyrdy.

Bul ózgeriske jurtshylyq qýanyp jatyr.

Bul kóp sebeptiń bireýi ǵana...

Qazaq tiliniń kósegesin bir kógertse - osylar kógertedi-aý dep, óńirlerdegi Til basqarmalaryna úmit artýshy edik.

«Optımızasıa» degen bále shyqsa boldy, óńir basshylary eń aldymen Til basqarmalaryna ata jaýyndaı shúıligedi eken. Aldymen til basqarmasyn qysqartýǵa umtylady eken. Qazir 9 oblys pen respýblıkalyq dárejedegi qalalarda ondaı basqarma atymen joq, basqa bólimdermen aralasyp ketken nemese múldem quryǵan.

Til tóńireginde qalyptasqan mundaı jaǵdaı zıaly qaýymdy ǵana emes, barsha jurtshylyqty alańdatýda.

«Solqyldaqtyqty endi qoıý kerek, - deıdi bizdiń ustazymyz, Myrzataı Joldasbekov aǵamyz. – Qazaq tili týraly tereńdep oılanatyn kez keldi. Qazaqtyń tózimimen betaldy oınaýǵa bolmaıdy. Bizdiń tabanymyzdyń astynda babalarymyzdyń neshe qabat qany jatyr. Olar osy táýelsizdik úshin kúresti. Biraq olar jete almady, biz jettik. Biz sony eshqashan umytpaıyq. Sondyqtan latyn álipbıine kóshýge baılanysty memlekettik tildiń mártebesin ósirýge bárimiz bir kisideı jumylyp, kúsh salýǵa kiriseıik».

Aıtqanyńyz aıdaı kelsin, abyz aǵa!

Kúni keshe Prezıdent Qasym-Jomart Toqaev jańa álipbıdi jetildirý jóninde másele kóterdi.

Bul másele bizdiń Máde­nıet jáne sport mınıstrligi tara­py­nan sońǵy 3-4 aı boıy tal­qy­lanyp, mamandarmen pysyq­ta­lyp, Mınıstrimiz Aqtoty Raıym­qulovanyń Prezıdentpen kez­desýinde jan-jaqty áńgime bolǵan edi. Endi minekı, memleket basshysy ózi pármen berip, bizdiń jolymyzdy ashyp berip otyr.

Bul, sóz joq, barshamyz úshin jaǵymdy jańalyq, buıyrtsa, bul baǵytta ǵalymdarmen birlesip tıanaqty jumys isteıtin bolamyz.


Álibek Asqar,

«Til-Qazyna» ulttyq ǵylymı-praktıkalyq ortalyǵynyń

bas dırektory