Ortaq istiń uıytqysy

23.10.2019 Master slide 47
«Til- Qazyna» ulttyq ortalyǵynyń Redaksıalyq baspa basqarma basshysy Álim Sergibaevqa birneshe suraq qoıyp oı bólisken edik.

– Álim Sádýaqasuly, baspa isi qaı baǵyttardy qamtıdy?

– Qanatyn keńge jaıyp kele jatqan elimizdiń búgingi kelbeti ǵalamdyq keńistikke boı túzegen memlekettiń maqsat-mindetimen, baǵyt-baǵdarymen somdalady. Biz halyq pen til uǵymdarynyń sabaqtastyǵyn jalǵaıtyn jandarmyz. Óıtkeni, bizdiń ónimderimiz buqaranyń bilimi men ilimin damytady. Kitap – bilim bulaǵy. Bizdiń redaksıalyq baspa basqarma qyzmetkerleri josparǵa sáıkes úılestirý, aqparattyq-uıymdastyrý jáne baspa ónimderin ázirleý, shyǵarý baǵytyndaǵy qyzmet túrlerimen aınalysady.

– Bıyl qandaı oqý quraldary shyǵady?

– Ahmet Baıtursynuly «Óz tilimen sóılesken, óz tilimen jazǵan jurttyń ulttyǵy – esh ýaqytta adamy qurymaı joǵalmaıdy», dep edi. Qazaq til bilimi, eltaný, til oqytý men taldaý baǵytynda ǵylymı eńbekter jasalýda. Mine, sol eńbekterdi Qazaqstan Respýblıkasynda tilderdi damytý men qoldanýdyń 2011-2019 jyldarǵa arnalǵan memlekettik baǵdarlamasy aıasynda buqara halyqqa jetkizýshilerdiń birimiz.

Tal besikten ana tilinde sóılep, álippesin babalar tilinde tanı bastaǵan eldiń urpaǵy tarıhyn qasterleıdi ári dástúr-saltyn ardaqtaıtyn el bolady. Biz jas urpaqty tárbıeleıtin «Balalar ádebıeti» boıynsha S.Ákiramuly «Uqypty bala» degen balalarǵa arnalǵan óleńder jınaǵyn, S.Qamshyger «Tastamashy, ana!» aýdarma (bashqurt) tili, D.Ahmetov «Robot jáne alty asyq» kitaptaryn baspaǵa daıyndaýdamyz.

Al A.Baıtursynuly, T.Shonanuly «Bastaýyshqa arnalǵan oqý quraly», H.Dosmuhameduly «Adamnyń tán tirligi» oqý quraly baspadan shyqty.

Jyl sońyna deıin tanymdyq ádebıet boıynsha Saıa Iteǵulovanyń daıyndaǵan «Atameken» aqparattyq-tanymdyq jınaǵy oqyrmandaryn tabatyn bolady.

– Til forýmynyń nátıjesi qandaı bolady dep oılaısyz?

– Aldymen tilimiz latyngrafıkaly jańa álipbıge kóshý barysynda biliminiń jetistikterin tolyq ıgere alsaq,onda kóterilgen máselelerdi sheshsek, qazaq tili damýdyń jańa satysyna shyǵady. Al urpaǵymyz saýatty, bilimdi bolyp, ultymyz órkenıetti elderdiń kósh basynan tabylady.