Елбасымыз Нұрсұлтан Назарбаев­тың өзге ұлт өкілдері тілдерімен бірге, қазақ тілінің дамуына, өркен ­жаюына айрықша назар аударып келе жатқанын оның әрбір сөйлеген сөздерінен, жазған кітаптарынан жақсы білеміз. Ел аузында осы кезге дейін жатталып келе жатқан, бүгінде нақыл сөзге айналған «Екі қазақ бір-бірімен қазақша сөйлессін» деген ұлағатты сөзі мағынасы жағынан да, айтылу шеберлігі жағынан да тұғырлы тұлғаның ел-жұртына қамқорлығы деп түсінемін.

Нұрсұлтан Әбішұлы­ Назарбаевтың «Өмір өткелдері» атты кітабында Тәуелсіздіктің аса қиын кезеңдерінде Президентіміздің атқарған жұмыстары баяндалғаны белгілі. Журналист, ғалым Сауытбек Әбдірахмановтың ­Елбасымен сұхбаты ретінде жазылған осы кітаптың «Конституция үшін күрес» тарауында 1993 жылы Ата Заңның қабылдануында болған қиындықтар туралы айтылады. Нұрсұлтан Әбішұлы «Тілге байланысты да таласты жайлар жеткілікті еді» деп сөз бастап, «…1989 жылы ма, 1990 жылы ма, бекітілген әлгі кесте бойынша, оңтүстіктегі облыс­тарды былай қойғанда, солтүстіктегі аудандардың біразында да ісқағаздарын қазақша жүргізуге ауысу тоқсаныншы жылдардың орта шенінде-ақ шешіліп қалуға тиісті еді… Кез келген әрекет қарсы әрекет туғызбай қоймайды. Кей жерлерде жаңағыдай пікірлерге жауап ретінде «Тілдер туралы» Заңның күшін жою талабы да қойыла бастады. Ал бұған тіпті де жол беруге болмайтын (337 бет)» дейді. Сессияда өзінің бірнеше рет сөз алғанын, өзге депутаттардың да пікірлері мұқият тыңдалғанын, ақырында қазақ, орыс және басқа да тілдердің дамуы­на бірдей мүмкіндік беретін шешім қабылданғанын түсіндік. Бұдан бұрын да «Қазақстанның болашағы – қазақ тілінде» деген Елбасымыздың мемлекеттік тіл мәселесіне жете мән беруі, күні кешегі халыққа арнаған кезекті Жолдауында да ана тіліміздің қазіргі жай-күйі, оның мемлекеттік тіл ретіндегі мәртебеге ие жоғарғы орны туралы айтуы, оның тілге деген ерекше құрметін көрсетеді.

Біздің ендігі міндетіміз мемлекеттік тіліміз – айбынымыз екенін естен шығармай, оның көркемдігін, терең­дігін сақтаудың барлық шараларын атқара отырып, ұрпақтан-ұрпаққа өзге тілдермен шұбарланбаған, саф алтындай таза күйінде жеткізу.
Бүгінгі таңда Қазақстан әлеуметтік тұрақтылық орнаған, экономикасы өркендеп өскен, кешегі кеңестік елдер арасында экономикалық дамуы жөнінен қол жетпестей ілгері озған іргелі елге айналып, әлем жұртшылығын таңғалдырып отыр. Басқаларын айтпаған күннің өзінде, әлемнің алпауыт мемлекеттерінің өзі ішкі өнімнің құлдырауы салдарынан қиындықтар көріп, соңғы 15-20 жылдардың ішінде бірнеше дағдарыстарды бастан кешіріп отырған кезде, терең ойлы Елбасы іргетасын өзі қалаған Тәуелсіз мемлекетін қатерлі дағдарыстардан аман алып шыға білді. Осы кездерде, әсіресе жастармен кездесулерімізде айтатын:
Елбасы тапты шығар жол,
Дағдарыс деген кеселден.
Әлемді қысқан бұл дауыл,
Бола алмас бізге тосқауыл – деген өзіне арналған сенімімізді ел қамын мың ойлап, жүз толғанып жүретін Нұрекеңнің талмай іске асырып келе жатқаны барлық жұртшылықты қуантуда. Бұған сенім, біріншіден, республикамызда ел экономикасын дамытуға мүмкіндік беретін күш-қуаттың барлығы болса, екінші­ден, қайсы бір елдердегідей емес, біздің елімізде алаңсыз жұмыс жасауға мүмкіндік беретін ұлтаралық жарасымдылық пен тұрақтылыққа қызыққан инвесторлардың көптеп келулері деп білемін.
Облысымызға арнайы іссапар­мен келген Республика Парламенті Мәжілісінің депутаттары халық арасында кездесулер өткізіп, тұңғыш Президентіміз Нұрсұлтан ­Назарбаев ­жариялаған билік тармақтарын қайта бөлуге арналған Үндеуді және «Қазақстанның үшінші жаңғыруы: жаһандық бәсекеге қабілеттілік» атты халыққа Жолдауын таныстырды. Кездесулер жоғары деңгейде өтіп, Жолдау мен Конституция реформасына байланысты тыңдаушылар өз пікірлерімен алмасты. Мен ҚР ҰҒА академигі Серік Қирабаевтың «Мемлекеттік қызмет­керлердің адамды қабылдамай, онымен сөйлеспей, оңашалануы да келмеске кетуі керек» деген пікіріне қосыламын. Қоғамдық жұмыстармен айналысып, халқымыздың әлемдік өркениетке қосқан үлесі жайлы, бұрынғы өткен асылдарымыздың өмір жолдары мен қызметі жайлы әңгімелер өткізіп, олардың еңбектерін ел жадында сақтау, ескерткіштер тұрғызу қажеттігі жайлы сөз етіп жүрген бізге зейнеткерлік өмірдің бір қызықты да жақсы жері жастармен кездесу. Әрине, көбіне-көп олар келелі жиналыстарына, болмаса сұхбат алуға өздері құрметтеп шақырып отырады. Таяуда «Ақ жол – Жастар» жастар қанатында өткен басқосуда мемлекет қайраткері Жалау Мыңбаевтың 125 жылдығын атап өту туралы, Елбасының Үндеуі мен Конституциялық реформасы туралы кеңінен сөз болды. Осы кезесулерде жастардың белсенділігі, білмекке құмарлығы, тәуелсіз мемлекетіміздің жан-жақты дамуына қатысты келелі, ойлы пікірлерін ортаға салып келе жатқандығы қуантты. Сол үдерістеріне сәйкес Президентіміз Нұрсұлтан Әбішұлы көтеріп отырған елдік маңызы бар күрделі мәселелер де ­жастар тарапынан қолдау табуда.
«Мұратымыз – мәңгілік ел! Ақтық демім қалғанша, әл-дәрменім тал­ғанша, халық жүгін көтеруден қаш­паймын» деген Елбасымыз барлық Қазақстан халқын тәуелсіз еліміздің тұғырын бекіте түсуге жүмылдырады. Ұлы Даламызда Мәңгілік Қазақ Елі ­жасай беретін болады деп кәміл сенеміз.